‘பாரசைட்’ நாயகன் லீ சுன் கியூன் மர்ம மரணம்..?

தென்கொரிய நடிகர் லீ சுன் கியூன். ஆஸ்கர் விருதுபெற்ற ‘பாரசைட்’ திரைப்படம் மூலம் புகழடைந்த இவர் இறந்தநிலையில் கண்டெடுக்கப்பட்டுள்ளார். அது தற்கொலையா என்ற கோணத்தில் போலீஸார் விசாரித்து வருகின்றனர்.

பெரும் வரவேற்பைப் பெற்ற படம் ’பாரசைட்’ பாங் ஜூன் ஹோ இயக்கியது.

சிறந்த திரைப்படம், சிறந்த இயக்குநர் உள்ளிட்ட நான்கு ஆஸ்கர் விருதுகளை இது வென்றது.

ஒரு முக்கிய கதாபாத்திரத்தில் நடித்தவர் லீ சுன் கியுன். 2014ஆம் ஆண்டு இவர் நடித்த ‘எ ஹார்ட் டே’ திரைப்படம் உலகம் முழுவதும் நல்ல வரவேற்பைப் பெற்றது.

அவர் நடித்து இந்த ஆண்டு வெளியான ‘ஸ்லீப்’ என்ற திகில் படம்தான் கடைசியாக லீ நடித்தது.

48 வயதாகும் லீ டிசம்பர் 27 அன்று சியோல் நகரில் உள்ள ஒரு பூங்காவில் தனது காரின் உள்ளே இறந்த நிலையில் கண்டெடுக்கப்பட்டுள்ளார்.

அவரது உடலை கைப்பற்றிய போலீஸார் பிரேத பரிசோதனைக்கு அனுப்பி வைத்தனர்.

அவரது மரணம் தொடர்பாக போலீஸார் வழக்குப் பதிவு செய்து விசாரித்து வருகின்றனர்.

லீ சுன் கியுன் மறைவுக்கு பலரும் இரங்கல் தெரிவித்து வருகின்றனர்.

கடந்த சில மாதங்களாக லீ, கஞ்சா உள்ளிட்ட போதைப் பொருட்கள் பயன்படுத்தியதாக போலீஸ் விசாரணையில் இருந்து வந்தார்.

கடந்த அக்டோபர் மாதம், போலீஸ் விசாரணைக்குச் செல்லும் முன்பு செய்தியாளர்களிடம் பேசிய அவர், “இதுபோன்ற சம்பவத்தில் ஈடுபட்டதன் மூலம் என்மீது நம்பிக்கை வைத்த மக்களையும், என் குடும்பத்தையும் ஏமாற்றியதற்காக நான் மன்னிப்புக் கேட்டுக் கொள்கிறேன்’ என்று கூறியிருந்தார்.

இதன் அடிப்படையில் லீ சுன் கியுனின் மரணம் தற்கொலையா என்ற கோணத்தில் போலீஸார் விசாரணை மேற்கொண்டு வருகின்றனர்.